ಕ್ಯಾರೆಟ್ ಹಲ್ವಾ

 ಕ್ಯಾರೆಟ್ ಹಲ್ವಾ ಕಡಿಮೆ ಸಮಯದಲ್ಲಿ ಮಾಡಬಹುದಾದ ಸಿಹಿ ತಿನಿಸು.
ಬೇಕಾಗುವ ಸಾಮಾಗ್ರಿಗಳು:

• ಕ್ಯಾರೆಟ್ ತುರಿ- 2ಕಪ್
• ಹಾಲು-1/2ಕಪ್
• ಸಕ್ಕರೆ-1/4ಕಪ್
• ಕಂಡೆನ್ಸ್ಡ್ ಮಿಲ್ಕ್-2 ಟೀ ಚ
• ತುಪ್ಪ-2ಟೀ ಚ
• ಏಲಕ್ಕಿ ಪುಡಿ-1/4 ಟೀ ಚ (ಬೇಕಾದಲ್ಲಿ)
• ದ್ರಾಕ್ಷಿ,ಗೋಡಂಬಿ,ಬಾದಾಮಿ ಚೂರು-1/4ಕಪ್

ಮಾಡುವ ವಿಧಾನ:

1. ಮೊದಲಿಗೆ ದಪ್ಪ ತಳದ ಪಾತ್ರೆಯಲ್ಲಿ ಕ್ಯಾರೆಟ್ ತುರಿಯನ್ನು ಹಾಕಿ ಚೆನ್ನಾಗಿ  15-20 ನಿಮಿಷ ಹುರಿಯಬೇಕು.ಚೆನ್ನಾಗಿ ಬೆಂದು ಅರ್ಧದಷ್ಟು ಆಗಲಿ.
2. ಅದಕ್ಕೆ ಹಾಲನ್ನು ಸೇರಿಸಿ ಮಿಶ್ರ ಮಾಡಿ ಮುಚ್ಚಳ ಮುಚ್ಚಿ 10 ನಿಮಿಷ ಬೇಯಿಸಿ.
3. ಬೆಂದು ಮೆತ್ತಗಾದ ಕ್ಯಾರೆಟ್ ಮಿಶ್ರಣಕ್ಕೆ ಸಕ್ಕರೆ ಹಾಕಿ ಕರಗಿಸಿ,ಕಂಡೆನ್ಸ್ಡ್ ಮಿಲ್ಕ್ ಸೇರಿಸಿ ಕಲಸಿ.
4. ದ್ರಾಕ್ಷಿ,ಗೋಡಂಬಿ,ಬಾದಾಮಿ ಚೂರು, ಏಲಕ್ಕಿ ಪುಡಿ ಹಾಕಿ ಕಲಸಿ.
5. ರುಚಿ-ರುಚಿಯಾದ ಕ್ಯಾರೆಟ್ ಹಲ್ವಾ ತಿನ್ನಲು ರೆಡಿ.

ಮಾಡಿ ನೋಡಿ,ತಿಂದು ತಿಳಿಸಿ
ಟಿಪ್ಸ್:

• ಕಂಡೆನ್ಸ್ಡ್ ಮಿಲ್ಕ್ ಹಲ್ವಾದ ಹದ ಮತ್ತು ರುಚಿಯನ್ನು ಹೆಚ್ಚಿಸುತ್ತದೆ.ಬರಿ ಹಾಲಿನಲ್ಲೂ ಮಾಡಬಹುದು.
• ಏಲಕ್ಕಿ ಪುಡಿ ಬೇಡವಾದಲ್ಲಿ ಬಿಡಿ.

ಬಿಸಿಬೇಳೆ ಬಾತ್

    ಬೆಳಗ್ಗಿನ ತಿಂಡಿಗಳಲ್ಲಿ ಇದು ಒಂದು.ಸುಲಭ ಹಾಗೂ ರುಚಿಕರ.

ಬೇಕಾಗುವ ಸಾಮಾಗ್ರಿಗಳು:

• ಅಕ್ಕಿ -1/2 ಕಪ್
• ತೊಗರಿಬೇಳೆ1-1/2ಕಪ್
• ಶೇಂಗಾಕಾಳು-1ಟೀ ಚ
• ತರಕಾರಿಗಳು-1ಕಪ್(ಬೀನ್ಸ್, ಕ್ಯಾರೆಟ್, ಆಲೂಗಡ್ಡೆ, ಗಡ್ಡೆಕೋಸು)
• ಟೊಮೆಟೋ-1 ದೊಡ್ಡದು
• ಈರುಳ್ಳಿ-1
• ಹುಣಸೇರಸ-1/4 ಕಪ್
• ಬೆಲ್ಲ-1/4 ಟೀ ಚ
• ಉಪ್ಪು-ರುಚಿಗೆ
• ಬಿಸಿಬೇಳೆ ಬಾತ್ ಪುಡಿ-4ಟೀ ಚ

ಒಗ್ಗರಣೆಗೆ:

• ತುಪ್ಪ-2ಟೀ ಚ
• ಸಾಸಿವೆ-1/2 ಟೀ ಚ
• ಕರಿಬೇವು-1ಎಳೆ
• ಗೋಡಂಬಿ- 4-5
• ದೊಣ್ಣೆಮೆಣಸು-1/2(ಬೇಕಾದಲ್ಲಿ)
• ಈರುಳ್ಳಿ-1 ಸಣ್ಣದು

ಮಾಡುವ ವಿಧಾನ:

1. ಮೊದಲಿಗೆ ಒಂದು ಕುಕ್ಕರ್ ತೆಗೆದುಕೊಳ್ಳಿ,ಅದರಲ್ಲಿ ಅಕ್ಕಿ ಮತ್ತು ತೊಗರಿಬೇಳೆಯನ್ನು  ಸಮಪ್ರಮಾಣದಲ್ಲಿ ತೊಳೆದು ಹಾಕಿ,4ಕಪ್ ನೀರು ಸೇರಿಸಿ.
2. ಹೆಚ್ಚಿದ ಎಲ್ಲ ತರಕಾರಿಗಳನ್ನು ಸೇರಿಸಿ,ಶೇಂಗಾಕಾಳು, ಟೊಮೆಟೋ, ಈರುಳ್ಳಿ,ಉಪ್ಪು, ಹಾಕಿ ಕುಕ್ಕರ್ ಮುಚ್ಚಿ ಮೆತ್ತಗೆ ಬೇಯಿಸಿ.
3. ಬೆಂದ ಬೇಳೆ, ತರಕಾರಿ ಮಿಶ್ರಣವನ್ನು ಮಿಕ್ಸ್ ಮಾಡಿ,ಅದಕ್ಕೆ ಹುಣಸೆರಸ, ಬಿಸಿಬೇಳೆ ಬಾತ್ ಪುಡಿ,ಬೆಲ್ಲ,ಬೇಕಾದಲ್ಲಿ ನೀರು ಸೇರಿಸಿ,ಬೇಕಾದ ಹದಕ್ಕೆ ಮಾಡಿ, ಉಪ್ಪು ಖಾರ ರುಚಿ ನೋಡಿ.
4. ಮೇಲೆ ತಿಳಿಸಿದ ಒಗ್ಗರಣೆ ಸಾಮಗ್ರಿಗಳಿಂದ ಒಗ್ಗರಣೆ ಕೊಡಿ.
5. ರುಚಿ-ರುಚಿಯಾದ ಬಿಸಿಬೇಳೆ ಬಾತ್ ಖಾರ ಬೂoದಿಯೊಂದಿಗೆ ಸವಿಯಲು ಸಿದ್ಧ. 

ಟಿಪ್ಸ್:

• ಗೋಡಂಬಿ,ದೊಣ್ಣೆಮೆಣಸು ಬೇಕಾದಲ್ಲಿ ಮಾತ್ರ ಸೇರಿಸಿ.
• ತುಪ್ಪದ ಒಗ್ಗರಣೆ ರುಚಿಯನ್ನು ಎರಡರಷ್ಟು ಹೆಚ್ಚಿಸುತ್ತದೆ.

*ಮಾಡಿ ನೋಡಿ...ತಿಂದು ತಿಳಿಸಿ...

ಅಕ್ಕಿ ಮಣ್ಣಿ/ಹಾಲುಬಾಯಿ

       

             ಸಾಂಪ್ರದಾಯಿಕ ಕರ್ನಾಟಕ ಸಿಹಿ ತಿಂಡಿ "ಅಕ್ಕಿ ಮಣ್ಣಿ /ಹಾಲು ಬಾಯಿ"  ಬಾಯಲ್ಲಿಟ್ಟರೆ ಕರಗುವಂತ ತಿನಿಸು. ಇದನ್ನು ರಾಗಿಹಿಟ್ಟು & ಗೋಧಿಹಿಟ್ಟಿನಿಂದಲೂ ತಯಾರಿಸಬಹುದು. ಚಿಕ್ಕವರಿದ್ದಾಗ ಅಜ್ಜಿ ಮಾಡಿ ಕೊಡುತ್ತಿದ್ದರು. ಅಜ್ಜಿಯ ಕೈರುಚಿ ತಿಂದರೆ ಅದೇ ಸ್ವರ್ಗ ಅಲ್ವೇ. ಅವರನ್ನೇ ಕೇಳಿ ಈ ಸಿಹಿ ತಿನಿಸನ್ನು ಶೇರ್ ಮಾಡಿದ್ದೇನೆ....

ಬೇಕಾಗುವ ಸಾಮಾಗ್ರಿಗಳು:

ಅಕ್ಕಿ 1 ಕಪ್

ಬೆಲ್ಲ 1 ಕಪ್

ತೆಂಗಿನ ಕಾಯಿ 1/2ಕಪ್

ಏಲಕ್ಕಿ ಪುಡಿ 1/4ಟೀ ಚಮಚ ಅಥವಾ ಏಲಕ್ಕಿ-3

ಉಪ್ಪು ಚಿಟಿಕೆ

ತುಪ್ಪ 2 ಟೇಬಲ್ ಚಮಚ

ಮಾಡುವ ವಿಧಾನ:

1. ಅಕ್ಕಿಯನ್ನು 6 ಗಂಟೆಗಳ ಕಾಲ ನೆನೆಸಿ, ತೆಂಗಿನ ತುರಿ, ಏಲಕ್ಕಿ ಸೇರಿಸಿ ನುಣ್ಣಗೆ ರುಬ್ಬಿ. 
2. ರುಬ್ಬಿರುವ ಹಿಟ್ಟಿಗೆ ಬೆಲ್ಲ ಸೇರಿಸಿ ಕರಗಿಸಿ,ನೀರು ಸೇರಿಸಿ ತೆಳುವಾದ ಹಿಟ್ಟು ತಯಾರಿಸಿ.
3. ಒಂದು ದಪ್ಪ ತಳದ ಬಾಣಲೆಗೆ ರುಬ್ಬಿದ ಮಿಶ್ರಣ, ಉಪ್ಪು, ಸೇರಿಸಿ ಸಣ್ಣ ಉರಿಯಲ್ಲಿ ಬಿಸಿ ಮಾಡಿ.
4. ಹಿಟ್ಟು ತಳ ಹಿಡಿಯದಂತೆ ನಿಧಾನವಾಗಿ ತಿರುಗಿಸುತ್ತಲೇ ಇರಬೇಕು. ಇದು 10-15 ನಿಮಿಷ ಹಿಡಿಯುತ್ತದೆ.
5.  ಮಿಶ್ರಣ ಬಾಣಲೆ ಬಿಡುವ ಹಂತಕ್ಕೆ ತುಪ್ಪ ಹಾಕಿ , ಬಾಣಲೆ ಬಿಟ್ಟು ಮಿಶ್ರಣ ಒಂದು ಉಂಡೆಯ ಹದಕ್ಕೆ ಬಂದಮೇಲೆ ತುಪ್ಪ ಸವರಿದ ಪ್ಲೇಟ್ ಗೆ ಹರಡಿ ಕಟ್ ಮಾಡಿ. 
6. ಬೇಕಿದ್ದರೆ ಅಲಂಕಾರಕ್ಕೆ ಬಾದಾಮಿ ಗೋಡಂಬಿ ಉಪಯೋಗಿಸಬಹುದು.

*ಮಾಡಿ ನೋಡಿ...ತಿನ್ನಿ ತಿಳಿಸಿ...

ಶೇಂಗಾ ಚಟ್ನಿ

          ಇದು ಒಂದು ಉತ್ತರ ಕರ್ನಾಟಕ ಖಾದ್ಯ .ಹುರಿದಿಟ್ಟ ಶೇಂಗಾ ಬೀಜ ಇದ್ದರೆ ಮಾಡುವುದು ಬಲು ಸುಲಭ ಮತ್ತು ರುಚಿಕರ.ಇದನ್ನು ಅನ್ನದೊಂದಿಗೆ,ದೋಸೆ, ಇಡ್ಲಿ, ಚಪಾತಿ,ರೊಟ್ಟಿ,ಎಲ್ಲವುದರ ಜೊತೆ ಸವಿಯಬಹುದು.

ಬೇಕಾಗುವ ಸಾಮಾಗ್ರಿಗಳು:

• 1 ಕಪ್ ಶೇಂಗಾ ಕಾಳು
• 3 ಹಸಿಮೆಣಸು
• 3 ಬೆಳ್ಳುಳ್ಳಿ ಎಸಳು
• ಸ್ವಲ್ಪ ಕೊತ್ತಂಬರಿಸೊಪ್ಪು
• 1 ಈರುಳ್ಳಿ ಸಣ್ಣಗೆ ಹೆಚ್ಚಿದ್ದು
• 1 ಎಸಳು ಕರಿಬೇವು
• 1/4 ಚಮಚ ಸಾಸಿವೆ
• 1/4 ಚಮಚ ಜೀರಿಗೆ
• 1 ಒಣಮೆಣಸು
• 2 ಚಮಚ ಎಣ್ಣೆ
• ರುಚಿಗೆ ಉಪ್ಪು
• ಚಿಟಿಕೆ ಬೆಲ್ಲ (ಬೇಕಾದಲ್ಲಿ)

ಮಾಡುವ ವಿಧಾನ:

1. ಮೊದಲಿಗೆ ಶೇಂಗಾಕಾಳನ್ನು ಬಾಣಲೆಯಲ್ಲಿ ಹಾಕಿ ಚೆನ್ನಾಗಿ ಹುರಿದು,ಆರಿಸಿ , ಸಿಪ್ಪೆ ಸುಲಿದು ಬದಿಗಿಡಿ.
2. ಅದೇ ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಹಸಿಮೆಣಸು ತುಂಡರಿಸಿ ಹಾಕಿ ಹುರಿದು ಆರಿಸಿ,ಸಿಪ್ಪೆ ತೆಗೆದ ಬೆಳ್ಳುಳ್ಳಿ , ಕರಿಬೇವು ಸೇರಿಸಿ.
3. ಮಿಕ್ಸಿ ಜಾರಿನಲ್ಲಿ ತಯಾರಿಸಿದ ಶೇಂಗಾಕಾಳು,ಹುರಿದ ಮಿಶ್ರಣ,ಕೊತ್ತಂಬರಿಸೊಪ್ಪು,ಉಪ್ಪು,ಜೀರಿಗೆ,ಚಿಟಿಕೆ ಬೆಲ್ಲ ಎಲ್ಲವನ್ನು ಒಟ್ಟಿಗೆ ರುಬ್ಬಿ.
4. ಮತ್ತೆ ಅದೇ ಬಾಣಲೆಗೆ ಎಣ್ಣೆ , ಸಾಸಿವೆ ಹಾಕಿ ಸಿಡಿಸಿ,ಜೀರಿಗೆ ,ಕರಿಬೇವು ,ಮುರಿದ ಒಣಮೆಣಸು ಹಾಕಿ ಚಟ್ನಿಗೆ ಒಗ್ಗರಣೆ ಕೊಡಿ.
5. ಸಣ್ಣಗೆ ಹೆಚ್ಚಿದ ಈರುಳ್ಳಿ ಸೇರಿಸಿ ಮಿಶ್ರ ಮಾಡಿ.

ರುಚಿ-ರುಚಿಯಾದ ಶೇಂಗಾಚಟ್ನಿ ಬಿಸಿ-ಬಿಸಿ ಅನ್ನದೊಂದಿಗೆ ಸವಿಯಲು ಸಿದ್ಧ.

ಟಿಪ್ಸ್:

• ಹಸಿಮೆಣಸು ಖಾರಕ್ಕೆ ತಕ್ಕಂತೆ ಬಳಸಿ.
• ಮೊದಲೇ ಹುರಿದಿಟ್ಟ ಶೇಂಗಾ ಇದ್ದಲ್ಲಿ ಸ್ವಲ್ಪ ಬೆಚ್ಚಗೆ ಮಾಡಿಕೊಂಡು ಬಳಸಿ.
• ಈರುಳ್ಳಿ ಇಷ್ಟ ಇಲ್ಲದವರು ಚಟ್ನಿಗೆ ಸೇರಿಸದೆ , ಬದಿಯಲ್ಲಿ ಸಲಾಡ್ ರೂಪದಲ್ಲಿ ನೀಡಿ.

*ಮಾಡಿ ನೋಡಿ...ತಿನ್ನಿ ತಿಳಿಸಿ...

ಮಾವಿನಕಾಯಿ ಚಿತ್ರಾನ್ನ

ಈಗ ಮಾವಿನಕಾಯಿ ಸೀಸನ್ ಅಲ್ವಾ. ಬೇಗ ಬೇಗ ತಂದು ಚಿತ್ರಾನ್ನ ಮಾಡಿ ರುಚಿ ನೋಡಿ.

ಬೇಕಾಗುವ ಸಾಮಾಗ್ರಿಗಳು:

• 250 gm ಅನ್ನ
• 1 ಮಧ್ಯಮ ಗಾತ್ರದ ಮಾವಿನಕಾಯಿ
• 1/4 ಕಪ್ ತೆಂಗಿನತುರಿ
• ಕೊತ್ತಂಬರಿ ಸೊಪ್ಪು ಸ್ವಲ್ಪ

ಒಗ್ಗರಣಗೆ:

• 3 ಚಮಚ ಎಣ್ಣೆ
• 1/2 ಚ ಸಾಸಿವೆ
• 1/4 ಚ ಜೀರಿಗೆ
• 1/4 ಕಪ್ ಶೇಂಗಾಕಾಳು
• 1 ಹಿಡಿ ಕರಿಬೇವು
• 1/2 ಚ ಅರಿಸಿನ
• 1/2 ಚ ಕಡ್ಲೆಬೇಳೆ
• 1/2 ಚ ಉದ್ದಿನಬೇಳೆ

ಮಾಡುವ ವಿಧಾನ:

1. ಮೊದಲಿಗೆ ಮಾವಿನಕಾಯಿ ತುರಿದು,ತೆಂಗಿನತುರಿಯೊಂದಿಗೆ ರುಬ್ಬಿ ಇಡಿ.
2. ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ , ಸಾಸಿವೆ ಹಾಕಿ ಸಿಡಿಸಿ.
3. ಜೀರಿಗೆ,ಕಡ್ಲೆಬೇಳೆ, ಉದ್ದಿನಬೇಳೆ,ಕರಿಬೇವು ಹುರಿಯಿರಿ.
4. ಅದಕ್ಕೆ ಅರಿಶಿನ, ಶೇಂಗಾಕಾಳು ಹಾಕಿ ಕೈಯಾಡಿಸಿ, ಸಿಡಿಯಲು ಪ್ರಾರಂಭ ಆದಾಗ ಹಸಿಮೆಣಸು ಹಾಕಿ ಹುರಿಯಿರಿ.
5. ಈಗ ಮಾವಿನಕಾಯಿತುರಿ & ಕಾಯಿತುರಿ ರುಬ್ಬಿದ ಮಿಶ್ರಣ, ಉಪ್ಪು ಸೇರಿಸಿ ಕಲಕಿ.
6. ಗೊಜ್ಜು ರೆಡಿಯಾದ ಮೇಲೆ ತಯಾರಿಸಿಟ್ಟಿರುವ ಅನ್ನ ಸೇರಿಸಿ ಅನ್ನ ಪುಡಿಯಾಗದಂತೆ ನಿಧಾನವಾಗಿ ಮಿಶ್ರ ಮಾಡಿ.
7. ಕೊನೆಯಲ್ಲಿ ಹೆಚ್ಚಿದ ಕೊತ್ತಂಬರಿಸೊಪ್ಪು ಸೇರಿಸಿ.
8. ಶೇಂಗಾ ಚಟ್ನಿಪುಡಿ , ಉಪ್ಪಿನಕಾಯಿಯೊಂದಿಗೆ ಸವಿಯಿರಿ.

ಟಿಪ್ಸ್:

• ಮಾವಿನಕಾಯಿ & ತೆಂಗಿನತುರಿ ಒಟ್ಟಿಗೆ ರುಬ್ಬುವ ಬದಲು,ಬೇರೆ ಬೇರೆಯಾಗಿ ಸೇರಿಸಬಹುದು.
• ಮಾವಿನಕಾಯಿ ಎಷ್ಟು ಹುಳಿ ಇದೆ ಎಂದು ಮೊದಲೇ ನೋಡಿಕೊಳ್ಳಿ.

*ಮಾಡಿ ನೋಡಿ...ತಿಂದು ತಿಳಿಸಿ...

ಅಕ್ಕಿ ಕಡ್ಲೆಬೇಳೆ ಪಾಯಸ

      ಅಕ್ಕಿ ಕಡ್ಲೆಬೇಳೆ ಪಾಯಸವನ್ನು ರಾಮನವಮಿ ವಿಶೇಷ ಖಾದ್ಯವಾಗಿ ತಯಾರಿಸಲಾಗುತ್ತದೆ.ಈ ಪಾಯಸ ತಿನ್ನಲು ಬಲು ರುಚಿ.
ಬೇಕಾಗುವ ಸಾಮಾಗ್ರಿಗಳು:

• 1/2 ಕಪ್ ಅಕ್ಕಿ
• 1/4 ಕಪ್ ಕಡ್ಲೆಬೇಳೆ
• 2 ಟೀ ಚ ಗಸೆಗಸೆ
• 3/4 ಕಪ್ ಬೆಲ್ಲ
• 1/2 ಕಪ್ ತೆಂಗಿನತುರಿ
• ದ್ರಾಕ್ಷಿ,ಗೋಡಂಬಿ
• ಚಿಟಿಕೆ ಏಲಕ್ಕಿ ಪುಡಿ
• 1/2 ಲೋಟ ಹಾಲು (ಬೇಕಾದಲ್ಲಿ)

ಮಾಡುವ ವಿಧಾನ:

1. ಅಕ್ಕಿ ಹಾಗೂ ಕಡ್ಲೇಬೇಳೆಯನ್ನು ನೀರು ಹಾಕಿ ಬೇಯಿಸಿ.
2. ಗಸೆಗಸೆ ಹುರಿದು ತೆಗೆದಿಡಿ.
3. ತೆಂಗಿನತುರಿ,ಹುರಿದ ಗಸೆಗಸೆ ರುಬ್ಬಿ ರೆಡಿ ಇಡಿ.
4. ಬೆಲ್ಲಕ್ಕೆ ನೀರು ಹಾಕಿ ಕರಗಿಸಿ ,ಬೆಂದ ಅಕ್ಕಿ ಕಡ್ಲೆಬೇಳೆ ಮಿಶ್ರಣಕ್ಕೆ ಸೇರಿಸಿ ಕೈಯಾಡಿಸಿ.
5. ಅದಕ್ಕೆ ರುಬ್ಬಿದ ಪೇಸ್ಟ್, ಏಲಕ್ಕಿ ಪುಡಿ ಸೇರಿಸಿ.
6. ತುಪ್ಪದಲ್ಲಿ ದ್ರಾಕ್ಷಿ,ಗೋಡಂಬಿ ಹುರಿದು ಸೇರಿಸಿ ಮಿಶ್ರ ಮಾಡಿ.
7. ಪಾಯಸ ಸ್ವಲ್ಪ ನೀರಾಗೆ ಇರಲಿ,ಆರಿದ ಮೇಲೆ ಗಟ್ಟಿಯಾಗುತ್ತದೆ. ಬೇಕಾದ ಹದಕ್ಕೆ ಪಾಯಸ ತಯಾರಿಸಿ.

• ಇಡೀ ಏಲಕ್ಕಿಯನ್ನು ಕಾಯಿ ರುಬ್ಬುವಾಗ ಸೇರಿಸಿ ರುಬ್ಬಬಹುದು.
• ಒಣಕೊಬ್ಬರಿ ತುರಿಯನ್ನು ಬಳಸಬಹುದು.

*ಮಾಡಿ ನೋಡಿ...ತಿನ್ನಿ ತಿಳಿಸಿ...

ಶೇಂಗಾ ಚಟ್ನಿ ಪುಡಿ

  ಇದು ಉತ್ತರಕರ್ನಾಟಕದ ಜನಪ್ರಿಯ ಖಾದ್ಯ.
ಬೇಕಾಗುವ ಸಾಮಾಗ್ರಿಗಳು:

• 2 ಕಪ್ ಶೇಂಗಾಕಾಳು
• 1/2 ಕಪ್ ಪುಟಾಣಿ/ಹುರಿಗಡಲೆ (ಬೇಕಾದಲ್ಲಿ)
• 8-10 ಸಿಪ್ಪೆ ತೆಗೆದ ಬೆಳ್ಳುಳ್ಳಿ
• 10-18 ಒಣಮೆಣಸಿನಕಾಯಿ
• 10 ಎಲೆ ಕರಿಬೇವು
• ಉಪ್ಪು ರುಚಿಗೆ
• ಸಣ್ಣ ಲಿಂಬೆ ಗಾತ್ರದ ಹುಣಸೆಹಣ್ಣು

ಮಾಡುವ ವಿಧಾನ:

1. ಬಾಣಲೆಗೆ ಶೇಂಗಾಕಾಳು ಹಾಕಿ ಎಣ್ಣೆ ಹಾಕದೆ ಕೆಂಪಗೆ ಹುರಿದು , ಆರಲು ಬಿಡಿ.
2. ಒಣಮೆಣಸಿನಕಾಯಿ ಸಣ್ಣಉರಿಯಲ್ಲಿ ಹುರಿಯಿರಿ,ಅದಕ್ಕೆ ಕರಿಬೇವು,ಬೆಳ್ಳುಳ್ಳಿ ಸೇರಿಸಿ.
3. ಆರಿದ ಶೇಂಗಾಬೀಜವನ್ನು ಚೆನ್ನಾಗಿ ಉಜ್ಜಿ ಸಿಪ್ಪೆ ತೆಗೆಯಿರಿ.
4. ಮಿಕ್ಸಿ ಜಾರಿನಲ್ಲಿ ಸಿಪ್ಪೆ ತೆಗೆದ ಶೇಂಗಾಕಾಳು,ಪುಟಾಣಿ,ಬೆಳ್ಳುಳ್ಳಿ,ಕರಿಬೇವು,ಒಣಮೆಣಸು,ಉಪ್ಪು,ಹುಣಸೆಹಣ್ಣು ಎಲ್ಲವನ್ನು ಹಾಕಿ ರುಬ್ಬಿ.ಸ್ವಲ್ಪ ತರಿತರಿಯಾಗಿರಲಿ.
5. ಜೋಳದ ರೊಟ್ಟಿ,ಮೊಸರು ಜೊತೆ,ದೋಸೆಯ ಮೇಲೆ ಉದುರಿಸಲು,ಪ್ರಯಾಣ ಮಾಡುವಾಗ ಬಳಸಲು ಚೆನ್ನಾಗಿರುತ್ತದೆ.
6. ಗಾಳಿಯಾಡದ ಡಬ್ಬಿಯಲ್ಲಿ ಹಾಕಿಟ್ಟರೆ 2 ತಿಂಗಳು ಮೇಲ್ಪಟ್ಟು ಇಡಬಹುದು.

ಟಿಪ್ಸ್:

• ರುಬ್ಬುವಾಗ -ಒಂದೇ ಸಲಕ್ಕೆ ರುಬ್ಬಬೇಡಿ,ನಿಲ್ಲಿಸಿ ನಿಲ್ಲಿಸಿ ರುಬ್ಬಿ.ಇಲ್ಲವಾದಲ್ಲಿ ಶೇಂಗಾಕಾಳು ಎಣ್ಣೆ ಬಿಟ್ಟು ಪೇಸ್ಟ್ ರೀತಿ ಆಗುತ್ತದೆ.
• ಒಣಮೆಣಸಿನ ಬದಲು ಖಾರದ ಪುಡಿ ಬಳಸಬಹುದು.ಮನೆಯಲ್ಲೆ ತಯಾರಿಸಿದ ಖಾರದ ಪುಡಿಯಾದಲ್ಲಿ ರುಚಿ ಹೆಚ್ಚುತ್ತದೆ.
• ಬ್ಯಾಡಗಿ ಮೆಣಸು ಬಣ್ಣಕ್ಕೆ,ಗುಂಟೂರು ಮೆಣಸು ಖಾರಕ್ಕೆ ಬಳಸಬಹುದು.

***ಮಾಡಿ ನೋಡಿ...ತಿನ್ನಿ ತಿಳಿಸಿ...

ಸಾಂಬಾರ್ ಪುಡಿ/ಸಾರಿನ ಪುಡಿ- ವಿಧಾನ ೧

ಬೇಕಾಗುವ ಸಾಮಾಗ್ರಿಗಳು:

• 1 ಕಪ್ ಒಣಮೆಣಸಿನಕಾಯಿ
• 1/4 ಚಮಚ ಉದ್ದಿನಬೇಳೆ
• 3/4 ಚಮಚ ಮೆಂತ್ಯಕಾಳು
• 3/4 ಚಮಚ ಜೀರಿಗೆ
• 3/4 ಚಮಚ ಸಾಸಿವೆ
• 1/2 ಕಪ್ ಧನಿಯಾ ಕಾಳು
• 10-15 ಕರಿಬೇವು
• 1/4 " ಅರಿಸಿನಕೊಂಬು
• 1/4 ಚಮಚ ಇಂಗಿನಪುಡಿ 

ಮಾಡುವ ವಿಧಾನ:

1. ಮೇಲೆ ತಿಳಿಸಿದ ಎಲ್ಲಾ ಸಾಮಾಗ್ರಿಗಳನ್ನು ಎಣ್ಣೆ ಹಾಕದೆ ಬೇರೆ ಬೇರೆಯಾಗಿ ಸಣ್ಣ ಉರಿಯಲ್ಲಿ ಘಮ ಬರುವವರೆಗೆ ಹುರಿಯಿರಿ.
2. ಪೂರ್ತಿ ತಣ್ಣಗಾಗಲು ಬಿಡಿ.
3. ಆರಿದ ಮೇಲೆ ಒಂದು ಮಿಕ್ಸಿ ಜಾರಿಗೆ ಸೇರಿಸಿ ನುಣ್ಣಗೆ ರುಬ್ಬಿ. ನೀವು ಜಾಸ್ತಿ ಅಳತೆ ಮಾಡುವುದಾದಲ್ಲಿ ಗಿರಣಿಯಲ್ಲಿ ಪುಡಿ ಮಾಡಿಸಿ.
4. ಈ ಸಾರಿನ ಪುಡಿ ಸಾಂಬಾರ್ ,ಪಲ್ಯ ಎಲ್ಲವಕ್ಕೂ ಬಳಸಬಹುದು.

***ಮಾಡಿ ನೋಡಿ...ತಿನ್ನಿ ತಿಳಿಸಿ...