ತಾಲಿ ಪೆಟ್ಟು/Rice flour masala roti

   

      ತಾಲಿಪೆಟ್ಟು ಎಂದರೆ ಅಕ್ಕಿರೊಟ್ಟಿ ರೀತಿಯೇ ಇರುವ ಇನ್ನೊಂದು ನಮೂನೆಯ ರೊಟ್ಟಿ. ಅಕ್ಕಿ ರೊಟ್ಟಿ ಸಾದಾ ಮಾಡುತ್ತಾರೆ,ಆದರೆ ತಾಲಿಪೆಟ್ಟು ಮಾತ್ರ ಮಸಾಲ,ಸೊಪ್ಪು ಉಪಯೋಗಿಸಿ ಮಾಡುತ್ತಾರೆ.ಇದು ಉತ್ತರ ಭಾರತದ ತಿನಿಸುಗಳಲ್ಲೊಂದು.
      ಬೆಳಗಿನ ತಿಂಡಿಗೆ ಏನು ತಯಾರಿ ಮಾಡಿಕೊಳ್ಳದಿದ್ದಲ್ಲಿ ತಕ್ಷಣಕ್ಕೆ ಈ ತಿಂಡಿಯನ್ನು ಮಾಡಬಹುದು. ಮೊದಲಿಗೆ ಸ್ವಲ್ಪ ರಗಳೆ ಎನಿಸಿದರೂ ಒಂದೆರಡು ಬಾರಿ ಮಾಡಿದಾಗ ತುಂಬಾ ಸುಲಭವಾಗಿ ಬರುತ್ತದೆ.

ಕೆಳಗೆ ಕೊಟ್ಟಿರುವ ಅಳತೆಗೆ ಸುಮಾರು 15 ತೆಳ್ಳಗಿನ ತಾಲಿಪೆಟ್ಟು ಮಾಡಬಹುದು.
ಬೇಕಾಗುವ ಸಾಮಾಗ್ರಿಗಳು:
ಅಕ್ಕಿಹಿಟ್ಟು-3ಬಟ್ಟಲು
ನೀರು-3 1/4ಬಟ್ಟಲು
ಈರುಳ್ಳಿ-1
ಹಸಿಮೆಣಸಿನ ಪೇಸ್ಟ್-3 ರದ್ದು
ಜೀರಿಗೆ/ಓಂಕಾಳು-1/2ಚಮಚ
ಕೊತ್ತಂಬರಿ ಸೊಪ್ಪು-1/2 ಬಟ್ಟಲು
ಸಬ್ಬಸಿಗೆ ಸೊಪ್ಪು-1/2 ಬಟ್ಟಲು(ಇಲ್ಲವಾದಲ್ಲಿ ಬಿಡಿ)
ಕರಿಬೇವು-6ಎಲೆ
ಎಣ್ಣೆ-ಅಗತ್ಯಕ್ಕೆ
ಮಾಡುವ ವಿಧಾನ:
1.ಮೊದಲಿಗೆ ಒಂದು ದೊಡ್ಡ ಪಾತ್ರೆಯಲ್ಲಿ ನೀರು ಅಳತೆ ಮಾಡಿ ಹಾಕಿ ಕುದಿಯಲು ಬಿಡಿ.
2.ಕುದಿಯುತ್ತಿರುವ ನೀರಿಗೆ ಉಪ್ಪು,ಈರುಳ್ಳಿ,ಅಕ್ಕಿಹಿಟ್ಟನ್ನು ಸೇರಿಸಿ,3 ನಿಮಿಷ ಹಾಗೆಯೇ ಬಿಡಿ(ಕೈಯಾಡಿಸಬೇಡಿ).
3. ಹಿಟ್ಟು ಬೆಂದಾಗ ಚೆನ್ನಾಗಿ ಕಲಸಿ ಗಂಟಿಲ್ಲದಂತೆ ಮಿಶ್ರ ಮಾಡಿ.
4.ಒಂದು ಪಾತ್ರೆಗೆ ಹಸಿಮೆಣಸಿನಕಾಯಿ ಪೇಸ್ಟ್, ಸೊಪ್ಪುಗಳು, ಓಂಕಾಳು, ಸಣ್ಣಗೆ ಹೆಚ್ಚಿದ ಕರಿಬೇವು,ಬಿಸಿ ಹಿಟ್ಟಿನ ಮಿಶ್ರಣ ಸೇರಿಸಿ ಎಲ್ಲವನ್ನು ಚೆನ್ನಾಗಿ ಕಲಸಿ.

5. ಹಿಟ್ಟಿನ ಪ್ರಮಾಣ ಜಾಸ್ತಿ ಎನಿಸಿದರೆ ಸ್ವಲ್ಪ ಭಾಗ ಅಷ್ಟೇ ತೆಗೆದುಕೊಂಡು ಚೆನ್ನಾಗಿ ನಾದಿ.

6.ಕಿತ್ತಳೆ ಗಾತ್ರದ ಉಂಡೆ ಮಾಡಿ ಪ್ಲಾಸ್ಟಿಕ್ ಹಾಳೆಯ ಮೇಲಿಟ್ಟು ಇನ್ನೊಂದು ಹಾಳೆ ಮುಚ್ಚಿ ,ಲಟ್ಟಣಿಗೆಯಿಂದ ತೆಳ್ಳಗೆ ಲಟ್ಟಿಸಿ.(ಬದಿ ಒಡೆದರೆ ಕೈಯಿಂದ ಸರಿ ಮಾಡಿಕೊಳ್ಳಬೇಕು).

7 .ಹೆಂಚಿಗೆ ಎಣ್ಣೆ ಸವರಿ 2 ಕಡೆ ಕೆಂಪು ಚುಕ್ಕೆ ಬರುವ ಹಾಗೆ ಬೇಯಿಸಿ.

       ತೆಂಗಿನಕಾಯಿ-ಕಡ್ಲೆ ಚಟ್ನಿಯೊಂದಿಗೆ ಬಿಸಿ-ಬಿಸಿಯಾಗಿ ತಿನ್ನಲು ಬಲು ರುಚಿ .
ಸೂಚನೆ:
1.ಹಿಟ್ಟು ತುಂಬಾ ಬಿಸಿಯಿದ್ದಾಗ ನಾದಬೇಡಿ.
2.ಅಂಟು ಎನಿಸಿದರೆ ಕೈಗೆ ಎಣ್ಣೆ ಸವರಿಕೊಳ್ಳಿ.
  ಮಾಡಿ ನೋಡಿ,ತಿಂದು ತಿಳಿಸಿ.

ಸೊಪ್ಪು - ಬೇಳೆ ಪಲ್ಯ

   ಸೊಪ್ಪು ಬೇಳೆ ಪಲ್ಯ ರೊಟ್ಟಿ, ಚಪಾತಿಯ ಜೊತೆ ತಿನ್ನಲು ತುಂಬಾ ಚೆನ್ನಾಗಿರುತ್ತದೆ.
ಬೇಕಾಗುವ ಸಾಮಾಗ್ರಿಗಳು:
ತೊಗರಿಬೇಳೆ-1/4 ಬಟ್ಟಲು
ಸೊಪ್ಪುಗಳು(ದಂಟು,ಹರಿವೆ, ರಾಜಗಿರ, ಸಬ್ಬಸಿಗೆ)-1ಬಟ್ಟಲು
ಹಸಿಮೆಣಸು-1 ರಿಂದ 2
ಈರುಳ್ಳಿ-1
ಬೆಳ್ಳುಳ್ಳಿ-4 ಎಸಳು
ಸಾಸಿವೆ-1/2ಚಮಚ
ಅರಿಸಿನ-1/4 ಚಮಚ
ಕಾಯಿತುರಿ-1/4 ಬಟ್ಟಲು
ಉಪ್ಪು-ರುಚಿಗೆ
ಎಣ್ಣೆ-2 ಚಮಚ
ಮಾಡುವ ವಿಧಾನ:
1. ಒಂದು ಪಾತ್ರೆಯಲ್ಲಿ ನೀರು ಕುದಿಸಿ, ತೊಳೆದ ತೊಗರಿಬೇಳೆಯನ್ನು ಹಾಕಿ ಬೇಯಿಸಿ (ಮೆತ್ತಗಾಗಬಾರದು).
2.ಬೇಯಿಸಿದ ಬೇಳೆಯನ್ನು ಸೋಸಿ ಇಡಿ.
3.ಬಾಣಲೆಗೆ ಎಣ್ಣೆ ಹಾಕಿ ಸಾಸಿವೆ ಸಿಡಿಸಿ,ಬೆಳ್ಳುಳ್ಳಿ ಹಾಕಿ ಹುರಿಯಿರಿ.
4.ಈಗ ಈರುಳ್ಳಿ ಸೇರಿಸಿ ಚೆನ್ನಾಗಿ ಹುರಿಯಿರಿ.
5.ನಂತರ ಸಣ್ಣಗೆ ಹೆಚ್ಚಿದ ಸೊಪ್ಪನ್ನು ಹಾಕಿ ಬೇಯಿಸಿ.
6.ಬೇಯಿಸಿದ ಬೇಳೆ, ಸ್ವಲ್ಪ ಬೇಳೆಕಟ್ಟು (ಬೇಕಾದಲ್ಲಿ), ಉಪ್ಪ್ಪು, ಸೇರಿಸಿ ಬೇಯಿಸಿ.
7.ಕೊನೆಯಲ್ಲಿ ಕಾಯಿತುರಿ ಹಾಕಿ ಕೈಯಾಡಿದರೆ ಸೊಪ್ಪು-ಬೇಳೆ ಪಲ್ಯ ಸವಿಯಲು ಸಿದ್ಧ.

ಮಿರ್ಚಿ/Mirchi/ಹಸಿಮೆಣಸಿನಕಾಯಿ ಬೋಂಡ

       

ಉತ್ತರ ಕರ್ನಾಟಕದ ವಿಶೇಷ ತಿನಿಸುಗಳಲ್ಲಿ ಮಿರ್ಚಿ ಕೂಡ ಒಂದು.ಸಂಜೆಯಾದರೆ ಸಾಕು ಮಿರ್ಚಿ ಮಂಡಕ್ಕಿ ಸುವಾಸನೆ ಮೂಗಿಗೆ ಬಡಿಯುತ್ತದೆ.
        ಎಲ್ಲಾ ರೀತಿಯ ಸಮಾರಂಭಗಳಲ್ಲಿ ಮಿರ್ಚಿ ಪ್ರಮುಖ ಪಾತ್ರ ವಹಿಸುತ್ತದೆ. ಹಾಗಾದರೆ ಮಾಡುವ ವಿಧಾನ ತಿಳಿದುಕೊಳ್ಳೋಣ.
ಬೇಕಾಗುವ ಸಾಮಾಗ್ರಿಗಳು:
ಬಜ್ಜಿ ಮೆಣಸಿನಕಾಯಿ/ಖಾರವಿಲ್ಲದ ಹಸಿಮೆಣಸು-4-5
ಕಡಲೆಹಿಟ್ಟು-1ಬಟ್ಟಲು
ಜೀರಿಗೆ/ಓಂಕಾಳು-1ಚಮಚ
ಉಪ್ಪು-ರುಚಿಗೆ
ಅಡುಗೆ ಸೋಡಾ-ಚಿಟಿಕೆ
ಜೀರಿಗೆ ಪುಡಿ-1/2 ಚಮಚ
ಬಿಸಿಎಣ್ಣೆ-1ಚಮಚ
ಎಣ್ಣೆ-ಕರಿಯಲು
ಮಾಡುವ ವಿಧಾನ:
1.ಒಂದು ಬಟ್ಟಲಿಗೆ ಮೇಲೆ ತಿಳಿಸಿದ ಎಲ್ಲಾ ಸಾಮಾಗ್ರಿಗಳನ್ನು ಹಾಕಿ .
2. ಬೇಕಾದಷ್ಟು ನೀರು ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ತನ್ನಿ.

3.ಈಗ ಮೆಣಸಿನಕಾಯನ್ನು ಸೀಳಿ ಮಧ್ಯದಲ್ಲಿ ಜೀರಿಗೆ ಪುಡಿ ,ಉಪ್ಪು ಮಿಶ್ರಣ ಸೇರಿಸಿ.

4.ತಯಾರಿಸಿದ ಹಿಟ್ಟಿನಲ್ಲಿ ಅದ್ದಿ ಕರಿಯಿರಿ.

ಸೂಚನೆ:
* ಮೆಣಸಿನಕಾಯಿ ಒಳಗೆ ತುಂಬಲು ಜೀರಿಗೆ, ಉಪ್ಪಿನ ಜೊತೆ ಒಣಕೊಬ್ಬರಿ ಪುಡಿ ಉಪಯೋಗಿಸಬಹುದು.
*ಮೆಣಸಿನಕಾಯಿ ದೊಡ್ಡದಿದ್ದಲ್ಲಿ ಮಧ್ಯ ಕತ್ತರಿಸಿ, ಇಲ್ಲವಾದಲ್ಲಿ ತುದಿ ಅಷ್ಟೇ ತೆಗೆಯಿರಿ.
*ಮಸಾಲ ಮಿರ್ಚಿ ಮಾಡಲು, ಕರಿದ ಮಿರ್ಚಿ ಮಧ್ಯ ಕತ್ತರಿಸಿ ಈರುಳ್ಳಿ, ಕೊತ್ತಂಬರಿ ಸೊಪ್ಪು, ಸೇವ್ ಸೇರಿಸಿ ಸವಿಯಿರಿ.

    ಮಾಡಿ ನೋಡಿ,ತಿಂದು ತಿಳಿಸಿ.

ಹೀರೆಕಾಯಿ ಬಜ್ಜಿ/ Ridgegourd bajji

   

ಹೀರೆಕಾಯಿ ಬಜ್ಜಿ ಸಂಜೆಯ ತಿಂಡಿ . ಬೇಗ ಆಗುವ ಕಡಿಮೆ ಸಾಮಗ್ರಿ ಬಳಸಿ ಮಾಡುವ ತಿನಿಸು. ಹೀರೆಕಾಯಿ ಸಿಪ್ಪೆ ತೆಗೆದು ಇಟ್ಟಿದ್ದಲ್ಲಿ 10 ನಿಮಿಷದಲ್ಲಿ ಮಾಡಿ ತಿಂದು ಸಂತೋಷ ಪಡಬಹುದು.
ಬೇಕಾಗುವ ಸಾಮಾಗ್ರಿಗಳು:
ಹೀರೆಕಾಯಿ - 1
ಕಡಲೆಹಿಟ್ಟು-1/2 cup
ಖಾರದ ಪುಡಿ-1 ಚಮಚ
ಜೀರಿಗೆ/ಓಂ ಕಾಳು-1/4 ಚಮಚ
ಉಪ್ಪು-ರುಚಿಗೆ
ಬಿಸಿಎಣ್ಣೆ-1/2 ಚಮಚ
ಎಣ್ಣೆ-ಕರಿಯಲು
ಮಾಡುವ ವಿಧಾನ:
1.ಹೀರೆಕಾಯಿ ಸಿಪ್ಪೆ ತೆಗೆದು, ತೆಳ್ಳಗೆ ದುಂಡಗಾಗಿ ಹೆಚ್ಚಿ.
2.ಒಂದು ಬಟ್ಟಲಿಗೆ ಕಡಲೆಹಿಟ್ಟು, ಉಳಿದ ಎಲ್ಲಾ ಸಾಮಗ್ರಿಗಳನ್ನು ಹಾಕಿ.
3.ನೀರು ಸೇರಿಸಿ ತೆಳ್ಳಗೆ ಹಿಟ್ಟನ್ನು ತಯಾರಿಸಿ,ಎಣ್ಣೆ ಕಾಯಲು ಇಡಿ.

4.ಹೀರೇಕಾಯಿಗಳನ್ನು ಒಂದೊಂದಾಗಿ ಹಿಟ್ಟಿನಲ್ಲಿ ಅದ್ದಿ, ಕರಿಯಿರಿ.

     ಮಾಡಿ ನೋಡಿ, ತಿಂದು ತಿಳಿಸಿ.

ಕೊಬ್ಬರಿ ಮಿಠಾಯಿ/Coconut burfi

   

ಹಸಿ ಕೊಬ್ಬರಿ/ತೆಂಗಿನ ಕಾಯಿ ತುರಿ ಇದ್ದಲ್ಲಿ ಬೇಗ ಮಾಡಬಹುದಾದ ಸಿಹಿ ತಿನಿಸು ಈ ಕೊಬ್ಬರಿ ಮಿಠಾಯಿ.
ಬೇಕಾಗುವ ಸಾಮಗ್ರಿಗಳು:
ಹಸಿ ಕೊಬ್ಬರಿ ತುರಿ - 1 ಬಟ್ಟಲು
ಸಕ್ಕರೆ - 3/4 ಬಟ್ಟಲು
ಹಾಲು-1/4 ಬಟ್ಟಲು
ಏಲಕ್ಕಿ ಪುಡಿ- 1 ಚಿಟಿಕೆ
ತುಪ್ಪ-1ಚಮಚ

ಮಾಡುವ ವಿಧಾನ:
1.ದಪ್ಪ ತಳದ ಬಾಣಲೆ ಬಿಸಿ ಮಾಡಿ ಕಾಯಿತುರಿ ಹಾಕಿ ,ಜೊತೆಗೆ ಸಕ್ಕರೆ ಸೇರಿಸಿ ಕಲಸಿ.
2. ನಂತರ ಹಾಲು ಸೇರಿಸಿ ಚೆನ್ನಾಗಿ ಕೈಯಾಡಿಸಿ,1 ಚಮಚ ತುಪ್ಪ ಹಾಕಿ.
3. ಸಕ್ಕರೆ ಕರಗಿ ಮಿಶ್ರಣ ಒಂದು ಹದಕ್ಕೆ ಬರುವವರೆಗೆ ಕೈಯಾಡುತ್ತಿರಿ.
4. ಎಲ್ಲವೂ ಚೆನ್ನಾಗಿ ಮಿಶ್ರ ಆಗಿ ತಳ ಬಿಟ್ಟುಉಂಡೆಯಾಗುತ್ತ ಬಂದಾಗ ಏಲಕ್ಕಿ ಪುಡಿ ಸೇರಿಸಿ ತಕ್ಷಣ ಇಳಿಸಿ.
5.ಒಂದು ತುಪ್ಪ ಸವರಿದ ತಟ್ಟೆಗೆ ಸುರಿದು, ತಣ್ಣಗಾದ ಮೇಲೆ ಬೇಕಾದ ಆಕಾರಕ್ಕೆ ಕತ್ತರಿಸಿ.
     ದಿಢಿರಾಗಿ ತಯಾರಾಗುವ ಸಿಹಿ ತಿನಿಸು ಸವಿಯಲು ಸಿದ್ಧ.
ಮಾಡಿ ನೋಡಿ, ತಿಂದು ತಿಳಿಸಿ.